சக் தே இண்டியா

ஆல்ப்ஸ் மலையில் லதா மங்கேஷ்கர் ப்ளே பேக் பாட ராணி முகர்ஜி டான்ஸ், அடுத்த சீனில் 'சோனியே குடியே' என்று பேசி, மஞ்சள் நிறப்பூக்கள் நடுவில் வாழும் ராகுல் என்ற பெயருடைய ஹீரோ, சல்வார்- லிப்ஸ்டிக் இத்யாதியுடன் அம்மா கேரக்டரில் கிரோன் கேர், தடுக்கி விழுந்தால் மெஹந்தி-சன்யா சோளி-தங்க நகை மிளிர பாங்க்ரா பாடல் பாடும் ஏழைக் குடும்பம், திரும்பிய இடமெல்லாம் இந்தி மட்டுமே பேசும் நியூயார்க் மக்கள், காலையில் எழுந்திருக்கும்போதே ஒன்றரை டண் மேக்கப்புடன் பல்தேய்க்கும் ஹீரோயின்கள், கண்டிப்பாக கெஸ்ட் ரோலில் ஒரு அமிதாப் அல்லது அபிஷேக் பச்சன் - இது எதுவுமே இல்லாத யஷ் ராஜ் ஃபிலிம்ஸ் தயாரிப்புதான் சக் தே இந்தியா.

கதை:

இந்தியா-பாகிஸ்தான் ஹாக்கி ஃபைனல் பெனால்டி ஷுட் அவுட்டில் கோலை கோட்டைவிடும் கேப்டன் இந்திய கேப்டன் கபீர் கான் 'தேசத் துரோகி' என்று முத்திரை குத்தப்படுகிறார். ஏழு வருடங்கள் கழித்து, இந்திய மகளிர் ஹாக்கி அணிக்கு பயிற்சியாளராகி தான் கோட்டைவிட்ட தங்கத்தை மகளிர் அணி மூலமாக பெற்றுத்தருகிறாரா இல்லையா என்பதுதான் கதை.

பலம்:

படத்தின் ஒவ்வொரு சீன் முடிவையும் நம்மால் எளிதில் யூகிக்க முடிகிறது. இருந்தாலும் அதை போர் அடிக்காமல் சொல்லும் விதம் தான் படத்தின் பலம்.
கம்பெனி, பண்டிஒளர் பப்லி போன்ற ஹிட் படங்களை எழுதிய ஜெய்தீப் சஹானி என்பவர்தான் படத்தின் கதையை எழுதியவர். இவருடைய திரைக்கதையமைப்பு, வசனம் இரண்டுமே படத்தின் தூண்கள். மற்றொரு பலம் படத்தில் நடித்திருப்போர்.

முகங்கள்:

ஹாக்கி டீமின் 16 பேர் குழுவின் முகத் தெரிவு கனக்கச்சிதம். வடக்கு, தெற்கு, கிழக்கு, வடகிழக்கு என இந்தியாவின் எல்லா மாநிலங்களிலிருந்தும் ஹாக்கி பெண்கள். அவர்கள் கேரக்டருக்கு ஏற்றர்போல் உடலமைப்பு + நடிப்பு. பெரும்பாலானோர் முதன்முறையாக நடிக்கின்றனர் என்பது குறிப்பிடத்தக்கது. குறிப்பாக ஹரியானாவிலிருந்து வரும் கோமல் சவுதாலாவின் [சித்ராஷி ராவுத்]body language, accent, Lisp க்காகவே ஒரு ஷொட்டு! பஞ்சாபி குடி (பெண்) இல்லாமல் ஒரு யஷ் ராஜ் படமா? நெவர்! பல்பீர் கெளராக தான்யா ஆப்ரோல். அர்ஜென்டியா -vs- இந்தியா மேட்சில் (நெஜமாகவே) வெளுத்துவாங்குகிறார். சென்ற வருடத்தின் MTV Roadies நிகழ்ச்சியின் ரன்னர்- அப் போட்டியாளர் ஷுபி மெஹ்தா, ஒரு சீனியர் ப்ளேயராக அதே சமயம் டீமின் புது முகங்களிடம் ஈகோ இல்லாமல் விளையாடும் வீராங்கனையாக மிளிர்கிறார். அவருக்கு கேரக்டரில் நேர்மாறாக சீனியர் என்ற ஈகோவுடன் பிந்தியா நாயக். கேப்டன் வித்யா ஷர்மா ரோலில் மாடல் வித்யா மாலாவாடே நிறைவாக செய்துள்ளார்.

டீமின் முக்கிய பொறுப்பில் பணியாற்றும் கிருஷ்ணா-ஜி, தலைமையாளராக தில்லு முல்லு செய்யும் அஞ்சன் ஷ்ரீவாஸ்தவா போன்றோரும் கேரக்டருக்கு ஏற்றார்போல் நடித்துள்ளனர்.

படத்தை சக்க்க்க்க்கkkkk தே இந்தியாவாக மாற்றாமால் இயல்பாக நடித்திருப்பவர் ஷாருக்கான். தோல்வியடைந்த இந்திய டீமின் கேப்டனாக, ஹாக்கி பெண்களை பெண்டு நிமிர்த்தும் கோச்சாக, பேருக்கு் ப்ளாஷ் பேக்கில்கூட (விபத்தில் இறந்த மனைவி??) ஹீரோயின் இல்லாமல் பயிற்சியாளார் கபீர்கான் ரோலில் ஷாருக்கான் - சபாஷ் கான்! வயதிற்கேற்றார்போல் அவருடைய குறுந்தாடி, உடையமைப்பு மேக்கப் - வெல்டன்!

காட்சிகள்:

ஷாருக் - ஹாக்கி போர்டின் முதல் மீட்டிங், லேடீஸ் ஹாக்கி டீம் ஹாஸ்டல் ரூமில் சின்னஞ்சிறு மோதல்கள், ஹாக்கி டீமின் ஈகோ ராணிகள் attitude போடுவது போன்ற பல காட்சிகள் இயல்பாக உள்ளன. ஹாக்கி டீமின் 16 பேர் குழுவின் அறிமுக சீன்கள் ஆஹா ரகம். குறிப்பாக ஆந்திராவின் நேத்ரா ரெட்டி தன் பெயரை ரெஜிஸ்டர் செய்யும்போது, ரெஜிஸ்ட்ரார் கேள்விக்கு நேத்ராவின் அதிரடி பதில் - ஒரு சவுத் இந்தியனால் கை தட்டாமல் இருக்க முடியாது. நல்லவேளை அந்த பெண் தமிழராக சித்தரிக்கப்படவில்லை. ஃபைனல் மேட்சில் பெனால்டி சூட் அவுட்டில் கோல் அடிக்காமல் போகும் ஒரு தமிழரை... அதுவும் ஒரு இந்திப் படத்தில்.. 'நாம் வாழும்' வர்ச்சுவல் உலகம் விட்டுவைக்குமா? நல்ல வேளை நேத்ராகாரு ரெடியானார்!அதே போல் மணிப்பூரிலிருந்து வரும் இருவரும் ரெஜிஸ்டிரேஷன் டெஸ்க் காட்சியில் நம்மை "சூப்பர்!" சொல்ல வைக்கின்றனர். மெக்டோனல்ட் உணவக சீன், இன்டர்வெல் ப்ளாக், ஹாக்கி ஆண்கள்-பெண்கள் மேட்ச் மோதல் போன்றவை predictable ரகம் என்றாலும் சீன் முடிவில் கண்ணீர் துளி எட்டிப் பார்ப்பது உண்மை. ஆனால் ஓவர் senti-ஆக ஆரம்பத்திலும் முடிவிலும் ஷாருக் - அம்மா சீன் நம்மை படுத்துகிறது.

டெக்னிகல் குழு:

இக்பால், டோர் போன்ற படங்கின் ஒளிப்பதிவாளர் சுதீப் சாட்டர்ஜி யி்ன் ஒளிப்பதிவு ஓவர் glossy-யாக இல்லாமல் வெகு இயல்பாக உள்ளது. ஒலிப்பதிவு sync-sound முறையில் மானஸ் செளத்ரியால் செய்யப்பட்டுள்ளது- சிறப்பு. ராம் கோபால் வர்மாவின் தயாரிப்பில் அப் தக் சப்பன் படத்தை இயக்கிய ஷிமித் அமீனின் இரண்டாவது படம் இது. அப் தக் சப்பனில் மும்பை என்கவுண்டர் ஸ்பெஷலிஸ்ட் தயா நாயக்கின் கதையை படமாக்கிய இவர், சக் தே இண்டியாவில் முன்னாள் ஹாக்கி வீரர் மிர் ரஞ்சன் நெகியின் நிஜக் கதையை படமாக்கியிருக்கிறார். வாழ்த்துக்கள் ஷிமித்! சக் தே இண்டியா தரமான படம்.

முன்பெல்லாம் இந்த பாடலை கேட்டாலோ, டிவியில் பார்த்தாலோ உடனே சேனல் மாற்றும் நான், படம் பார்த்தபிறகு கூகிள் சேர்ச் போட்டு இந்த மியுசிக் வீடியோவைப் பார்த்தேன். கண்டிப்பாக அதற்கு இசையமைப்பாளர்கள் சலீம்-சுலைமான் காரணம் அல்ல. படம்தான். இசை, பஞ்சாபி நெடி தூக்கலான டைட்டில் சாங்குடன் சுமார் ரகம்.

அதாவது...

இதற்குமுன் நான் பார்த்த இந்தி படங்களில் இரண்டாம் முறை பார்க்கத் தூண்டிய, டிவிடி வாங்க வைத்த படங்கள் ரங் தே ப்சந்தி, லகான் மற்றும் தில் சாஹ்தா ஹே. மூன்றுமே ஆமீர் கான் படங்கள் என்பது coincidence தான். வேறேதும் இல்லை. இப்போது அந்த வரிசையில் மற்றொரு படத்தையும் சேர்க்கலாம் ... சக் தே இண்டியா.

கிரிக்கெட்டுக்கு ஒரு லகான் என்றால், ஹாக்கிக்கு ஒரு சக் தே இண்டியா.

சக் தே இண்டியா- அட்றா சக்கை!